Zaj no hais thaum uas mus ua tshoob rov los txog. Thaum tiam mej zeeg tas ces mej koob mej zeeg nkaw lus, nkaw lus tas ces nws muab lub ka...
Zaj no hais thaum uas mus ua tshoob rov los txog. Thaum tiam mej zeeg tas ces mej koob mej zeeg nkaw lus, nkaw lus tas ces nws muab lub kaus nthuav. Thaum koj txais kaus ntawm mej koob ces koj hais.
Niam Txiv Txais Kaus Ntawm Kej Koob Mej Zeeg => Niam Txiv Hais
1. Hais Zoo lis kus…Zoo li os… Yeeb vim yog peb Hmoob puj mus Hmoob yawm txoj kab tshoob ntaug los poob, kev kos ntaug los txog, kuv niam kuv tsis pom qab thov zog txog, lis thov tis raug laj tub laj li yau neb li tuaj sawv lawm tib nruj nrais rau lawm kuv niam kuv txiv qab plaj xab, ntshe tus plaj tshoob kev kos ces yuav tso rau neb nrog pab.
Zoo li kus os…Yeeb vim yog peb Hmoob puj mus Hmoob yawm txoj kab tshoob ntaug los poob, kev kos ntaug los txog, kuv niam kuv txiv tsis pom qab thov zog txog, li thov tis raug laj tub lis yau neb li tuaj sawv lawm tib nruj nrais rau lawm kuv niam kuv txiv lub qab plaj tsev, ntshe tus plaj tshoob kev kos ces yuav tso rau neb nrog leg.
2. Zoo li neb ncig lis yeev nqes tuaj txog , lub rooj ces twb tsis muaj rau neb nyob, kab yeeb nplooj ntsuab twb tsis muaj rau neb chob. Zoo li neb ncig lis yeev nqes tuaj txog, lub tog twb tsis muaj rau neb zaum, kab yeeb paj dawb twb tsis muaj rau neb haus.
3. Zoo li…kuv niam kuv txiv cia li tsaws niam nkauj kaus rau neb tej yas npab, neb cia li yoj kaus lis yeev seev mus ntoj kab. Zoo li…kuv niam kuv txiv cia li tsaws niam nkauj kaus, seev pob seev sis nyag rau neb tej quav tes, neb li yoj kaus li yeev seev mus ntoj kev.
4. Zoo li…neb mus niaj peb hnub, neb twb mus txus tau kuv niam kuv txiv tus ncej tshoob rov los poob. Zoo li…neb mus lawm niaj peb hmos, neb twb mus txus tau kuv niam kuv txiv tus ncej kos rov los txog.
5. Zoo li…txiv tuam mej koob, lwm mej zeeg, neb muab tau lawm neb lub ntsej lub muag coj mus ntaiv tag peb Hmoob puj mus Hmoob yawm tuaj tom ub cuaj tsav ci, yim tsav txuj; zoo li maj mam nws tig luj qas lis txog lawm ntuj nram qab teb nram ntsis, neb muaj tub zoo mus muab nyab, muaj ntxhais qua, neb vam tsis txog los tseg, yog neb vam txog, kuv niam kuv txiv tom no nws haj tseem los mus nco tib ntsuj ntsoov txog neb tus tshav ntuj.
Zoo li…txiv tuam mej koob, lwm mej zeeg, neb muab tau lawm neb lub ntsej muag coj mus ntaiv tag peb Hmoob puj mus Hmoob yawm tom ub cuaj tsav txuj, yim tsav ci; zoo li maj mam tig luj sis lis txog lawm ntuj nram qab, teb nram ntsis, neb muaj tub zoo mus muab nyab, muaj ntxhais qua, neb vam tsis txog los tseg, yog neb vam txog kuv niam kuv txiv tom no nws haj tseem nco ntsoov txog lawm neb tus txiaj ntsim.
Zaj no mus kawg li no xwb. Ib tsoom saib mam li muaj kho raws li siab nyiam nawb.
COMMENTS